ນອນຫຼັບພຽງພໍຊ່ວຍລຸດຄວາມສ່ຽງຕໍ່ການບາດເຈັບໄດ້ແທ້ຫວາ?

48
ນອນຫຼັບພຽງພໍຊ່ວຍລຸດຄວາມສ່ຽງຕໍ່ການບາດເຈັບໄດ້ແທ້ຫວາ?
p085qtdw

ການສຶກສາເທື່ອນີ້ສະແດງໃຫ້ເຫັນວ່າຄົນໄວຜູ້ໃຫຍ່ທີ່ສຸກຂະພາບດີ ຊຶ່ງໄດ້ຮັບການນອນຫຼັບພັກຜ່ອນຢ່າງນ້ອຍຄືນລະແປດຊັ່ວໂມງ ອາດມີໂອກາດນ້ອຍກວ່າທີ່ຈະໄດ້ຮັບບາດເຈັບຈາກການອອກກຳລັງກາຍທັ່ວໆໄປ

ການສຶກສານີ້ໃຊ້ຂໍ້ມູນຈາກທະຫານສະຫາລັດ ກວ່າ 7,500 ຄົນໃນກອງກຳລັງປະຕິບັດການພິເສດຂອງກອງທັບບົກ ຜູ້ທີ່ເຂົ້າຮ່ວມໃນການສຶກສາເປັນຜູ້ຊາຍປະມານ 95%

ນັກວິໄຈພົບວ່າທະຫານທີ່ນອນຫຼັບຄືນລະບໍ່ເກີນ 4-5 ຊັ່ວໂມງນັ້ນມີລາຍງານການບາດເຈັບທີ່ກະດູກ ຫຼື ກ້າມຊີ້ນໃນປີທີ່ແລ້ວຫຼາຍກວ່າຄົົນທີ່ນອນຫຼັບແປດຊັ່ວໂມງ ຫຼື ດົນກວ່ານັ້ນເຖິງສອງເທົ່າ

Tyson Grier ເຈົ້າຫນ້າທີ່ສາທາລະນະສຸກຂອງກອງທັບສະຫາລັດ ໃນລັດແມລີ່ແລນຊຶ່ງເປັນໜຶ່ງໃນຜູ້ຮ່ວມຂຽນລາຍງານການສຶກສາສະບັບນີ້ ເວົ້າວ່າການໄດ້ນອນຫຼັບພັກຜ່ອນຢ່າງພຽງພໍບໍ່ພຽງແຕ່ຊ່ວຍເສີມສະມັດຖະພາບທາງກາຍໃນໝູ່ຄົົນທີ່ແອກທີບ ຫຼື ຄົົນທີ່ເຄື່ອນໄຫວຮ່າງກາຍຢູ່ສະເໝີ ແຕ່ຢັງອາດຊ່ວຍການປ້ອງກັນການບາດເຈັບຂອງກ້າມຊີ້ນ ແລະ ກະດູກອີກດ້ວຍ

ໃນລະຫວ່າງການສຶກສາຕະຫຼອດທັງປີ ນາຍທະຫານຫຼາຍກວ່າເຄີ່ງເວົ້າວ່າພວກເຂົາໄດ້ຮັບບາດເຈັບທີ່ກ້າມຊີ້ນ ແລະ ກະດູກຢ່າງນ້ອຍໜຶ່ງເທື່ອ

ປະມານ 63% ລາຍງານວ່າໄດ້ນອນຫຼັບຄືນລະ 6-7 ຊັ່ວໂມງ 10% ລາຍງານວ່ານອນຄືນລະບໍ່ເກີນສີ່ຊັ່ວໂມງ ມີພຽງ 16% ເທົ່ານັ້ນທີ່ໄດ້ນອນ 8 ຊັ່ວໂມງຂຶ້ນໄປ

ເມື່ອປຽບທຽບກັບຜູ້ທີ່ໄດ້ນອນຫຼັບຄືນລະ 8 ຊັ່ວໂມງຂຶ້ນໄປແລ້ວ ທະຫານທີ່ນອນຫຼັບ 7 ຊັ່ວໂມງມີແນວໂນ້ມທີ່ຈະໄດ້ຮັບບາດເຈັບກ້າມຊີ້ນ ແລະ ກະດູກຫຼາຍກວ່າເຖິງ 24%

ເວົ້າໄດ້ສ່າຄວາມສ່ຽງເພີ່ມຂຶ້ນເມື່ອເວລານອນຫຼັບລຸດລົງ ໂດຍການນອນຫຼັບ 6 ຊັ່ວໂມງ ເພີ່ມຄວາມສ່ຽງຕໍ່ການບາດເຈັບ 53% ແລະ ຫາກນອນຫຼັບພຽງ 5 ຊັ່ວໂມງຄວາມສ່ຽງຂອງການບາດເຈັບນັ້ນຈະເພີ່ມຂຶ້ນເປັນສອງເທົ່າຕົວ

ນັກວິໄຈເວົ້າວ່າໃນກອງທັບບົກນັ້ນ ສອງໃນສາມຂອງການບາດເຈັບລ້ວນມາຈາກການໃຊ້ກ້າມຊີ້ນ ແລະ ກະດູກຫຼາຍເກີນໄປ ສ່ວນໃຫຍ່ເກີດຈາກການອອກກຳລັງກາຍ ຫຼື ການເຮັດກິດຈະກຳຊ້ຳໆ

ປະມານ 42% ຂອງທະຫານໃນກອງທັບລາຍງານວ່າຕົນເອງນອນຫຼັບໂດຍສະເລ່ຍຫ້າຊັ່ວໂມງ ຫຼື ນ້ອຍກວ່າໃນແຕ່ລະຄືນ ຊຶ່ງໃນການສຶກສາໄດ້ລະບຸໄວ້ວ່າການໃຫ້ທະຫານໄດ້ນອນຫຼັບພັກຜ່ອນຢ່າງພຽງພໍ ອາດເປັນວິທີຊ່ວຍລຸດຄວາມສ່ຽງຕໍ່ການບາດເຈັບໄດ້

ຂໍ້ຈຳກັດຢ່າງໜຶ່ງຂອງການສຶກສາວິໄຈນີ້ຄື ນັກວິໄຈມີພຽງຂໍ້ມູນທີ່ລະບຸວ່າທະຫານແຕ່ລະຄົນນອນຫຼັບຄືນລະຈັກຊັ່ວໂມງ ດັ່ງນັ້ນຈຶ່ງຈຳເປັນຕ້ອງມີການສຶກສາເພິ່ມເຕິມເພື່ອເບິ່ງວ່າການເພີ່ມເວລານອນຫຼັບຈະສາມາດຊ່ວຍລຸດການບາດເຈັບໄດ້ແທ້ ຫຼື ບໍ່

ນາຍແພດ Hohui Wang ຈາກມະຫາວິທະຍາໄລແຄລິຟໍເນຍ ວິທະຍາເຂດຊານຟານຊິດໂກ ຊຶ່ງບໍ່ມີສ່ວນກ່ຽວຂ້ອງກັບການສຶກສານີ້ເວົ້າວ່າການນອນນ້ອຍເກີນໄປເຮັດໃຫ້ສະມາທິ ແລະ ພະລັງຈິດລຸດລົງ ຊຶ່ງສາມາດນຳໄປສູ່ການບາດເຈັບຕ່າງໆໄດ້

ນາຍແພດ Wang ເວົ້າເສີມວ່າການນອນບໍ່ພໍເຮັດໃຫ້ເຊວໃນຫຼາຍໆ ອະໄວຍະວະເກີດການເສຍຫາຍ ແລະ ການນອນຫຼັບໃຫ້ດົນເປັນພິເສດອາດຊ່ວຍໃຫ້ຊ່ອມແຊມເຊວນີ້ໄດ້ຕາມການເວລາ

ຮ້ອຍໂທ Jeffrey Osgood ແຫ່ງສະຖາບັນວິໄຈ Walter Reed Army Institute of Research ໃນລັດແມລີ່ແລນດ໌ ເວົ້າວ່າກນສ່ວນໃຫຍ່ຈະມີສຸກຂະພາບດີ ແລະ ປະຕິບັດຫນ້າທີ່ໄດ້ດີທີ່ສຸດດ້ວຍການນອນຫຼັບຄືນລະ 7-9 ຊັ່ວໂມງ

ທ່ານໄດ້ແນະນຳວິທີທີ່ຈະເຮັດໃຫ້ນອນຫຼັບໄດ້ດົນຂຶ້ນ ແລະ ມີຄຸນນະພາບດີຂຶ້ນໄວ້ດັ່ງນີ້

  • ພະຍາຍາມຫຼີກລ້ຽງຄາເຟອີນ ນິໂຄຕິນ ກ່ອນການນອນຫຼັບ
  • ອອກກຳລັງກາຍກ່ອນນອນ
  • ຫຼີກລ້ຽງການໃຊ້ແອວກໍຮໍເປັນເຄື່ອງຊ່ວຍການນອນຫຼັບ
  • ຢ່າປ່ອຍໃຫ້ທ້ອງວ່າງກ່ອນນອນ
  • ພະຍາຍາມເຮັດໃຫ້ຫ້ອງນອນມືດ ແລະ ງຽບ
  • ໃຊ້ໜ້າກາກນອນຫຼັບສຳລັບປິດຕາ ຫຼື ອຸປະກອນອັດຫູຫາກຈຳເປັນ
  • ເກັບໂທລະສັບສະມາດໂຟນ ແລະ ອຸປະກອນອິເລັກໂທນິກຕ່າງໆ ໃຫ້ຫ່າງຈາກຕຽງນອນ

ການສຶກສານີ້ຕີພິມຢູ່ໃນວານສານ Sleep Health